DILG Magde-deploy ng Barangay Tanod sa Mga Paaralan para sa Kaligtasan ng mga Estudyante

Bilang tugon sa lumalalang pangamba sa seguridad ng mga kabataan, ilulunsad ng Department of the Interior and Local Government (DILG) ang malawakang deployment ng mga barangay tanod sa mga paaralan sa buong bansa. Ito ay alinsunod sa DILG Memorandum Circular 2025-072 na nag-aatas sa mga lokal na pamahalaan na magpatupad ng mas mahigpit na seguridad para sa mga estudyante.

Sa ilalim ng nasabing direktiba, ang mga tanod ay itatalaga hindi lamang upang magbantay sa oras ng pasukan at uwian, kundi pati na rin sa loob ng mga paaralan at sa mga lugar na karaniwang pinupuntahan ng mga estudyante matapos ang klase. Bahagi rin ng kanilang tungkulin ang agarang pag-uulat sa mga awtoridad ng anumang insidenteng may banta sa kaligtasan ng mga mag-aaral.

Hinihikayat ng DILG ang mga lungsod at munisipalidad, kasama ang mga alkalde, na maglaan ng sapat na logistic support para sa mga barangay na magpapatupad ng programang ito. Kabilang sa inaasahang tulong ay mga kagamitan para sa seguridad, karagdagang training, at transportasyon para sa mga tanod.

Ayon sa DILG, layon ng hakbang na ito na mabawasan ang mga insidente ng pang-aabuso, karahasan, at iba pang uri ng banta sa mga kabataan, at masigurong ligtas ang kapaligiran sa kanilang pag-aaral at pag-uwi.